Хаягжуулалтын тухай хуулийн хүрээнд хаягийн мэдээллийн санг 21 аймгийн хэмжээнд хэрэглээнд нэвтрүүлж, 1:100000 масштабтай байр зүйн зургийн 258,650 газар, усны нэрийг ашиглан 203,525 өвөлжөө, хаваржаа, газар тариалангийн газарт, хот, суурин газрын 1,079,000 нэгж талбар, 689,888 барилгын орц, гарцыг тус тус тодорхойлон шинээр хаяг олгох ажлыг зохион байгуулсан билээ.

Тэгвэл тус газар нь 2025 оноос эхлэн олон улсын жишигт нийцсэн Хаягийн удирдлагын системийн хөгжүүлэлтийн ажлыг хийж гүйцэтгэн нийслэлийн хэмжээнд хэрэглээнд нэвтрүүлэх ажлыг үе шаттай зохион байгуулан ажиллаж байна.

Дээрх ажлын хүрээнд нийслэл, 9 дүүргийн Газар зохион байгуулалтын албаны холбогдох мэргэжилтнүүдийг хамруулан тус системийн сургалтыг 2025 оны 06 дугаар сарын 12-ны өдөр зохион байгууллаа.

Энэхүү системийг нийслэлийн хэмжээнд нэвтрүүлэх ажлыг үе шаттай зохион байгуулж дууссанаар дараах боломжууд бүрдэх юм. Үүнд:

Нийслэлийн хэмжээнд газар, үл хөдлөх, эд хөрөнгөд хаягийг цахимаар олгох боломж бүрдэнэ;

Газар, үл хөдлөх, эд хөрөнгөнд хаягийг давхардалгүй нэгдсэн стандартын дагуу системээс автоматаар олгох, баталгаажуулах боломж бүрдэнэ;

Цагдаа, түргэн тусламж, онцгой байдал хаягийн системийг ашиглан төрийн үйлчилгээг иргэн, хуулийн этгээдэд түргэн шуурхай хүргэх боломж бүрдэнэ;

Шуудан хүргэлт, харилцаа холбоо зэрэг үйлчилгээг иргэн, аж ахуйн нэгж байгууллагуудад цаг алдалгүй хүргэх боломж бүрдэнэ;

Хувийн хэвшлийн үйлчилгээний чанар сайжирна;

Иргэн, хуулийн этгээд Газрын нэгдмэл сангийн удирдлагын системээр дамжуулан Хаягийн мэдээллийн системд нэвтэрч газар, үл хөдлөх, эд хөрөнгийн хаягийн тодорхойлолтыг цахимаар нээлттэй авах гэх мэт боломжууд бүрдэх юм.