Бэлчээрийн газрын төлөв байдал, чанарын өөрчлөлтийг тогтмол хугацаанд тасралтгүй хянах, өөрчлөлтийг илрүүлэх, урьдчилан сэргийлэх, ашиглалтыг тохируулах, үнэлэлт, дүгнэлт өгөх, холбогдох мэдээллийн санг үүсгэх зорилгоор бэлчээрийн газрын өөрчлөлтийг фото мониторингийн аргаар үнэлэх ажлыг 2015 оноос эхлэн жил бүр зохион байгуулж ирсэн.

Энэхүү ажлын үр дүнг улсын хэмжээнд нэгтгэн 2015, 2018, 2021 онуудад бэлчээрийн төлөв байдлын тайланг холбогдох байгууллагуудтай хамтран боловсруулж байсан бол 2026 онд тус тайланг 2020-2025 оны өгөгдөл, мэдээлэлд үндэслэн дахин улсын хэмжээнд боловсруулж байна. Энэ удаагийн тайланг НҮБ-ын Цөлжилттэй тэмцэх конвенцын талуудын 17 дугаар бага хурал (COP17)-ын үеэр олон улсын төлөөлөгч нарт танилцуулах юм.

Газар зохион байгуулалт, геодези, зураг зүйн ерөнхий газраас 2026 оны 03 дугаар сарын 11-ний өдөр “Бэлчээрийн төлөв байдлын үндэсний тайлан боловсруулах” сэдэвт хэлэлцүүлгийг “Дорнод Монголын хуурай хээрийн ландшафт, биологийн олон янз байдлын хамгаалал” төсөлтэй хамтран зохион байгуулсан ба тус хэлэлцүүлгээр бэлчээрийн газрын өнөөгийн төлөв байдал, цаашдын чиг хандлага, өөрчлөлтийг тодорхойлох үндэсний хэмжээний тайлангийн эхний хувилбарыг бэлчээрийн газартай холбоотой үйл ажиллагаа явуулдаг оролцогч талуудад танилцуулж, тэдгээрийн санал, зөвлөмжийг тайланд тусгаж, сайжруулахаар ажиллаж байна.

Хэлэлцүүлэгт Хүнс, хөдөө аж ахуй, хөнгөн үйлдвэрийн яам, Байгаль орчин, уур амьсгалын өөрчлөлтийн яам, Ус цаг уур, орчны судалгаа, мэдээллийн хүрээлэн, ШУА-ын Газарзүй, геоэкологийн хүрээлэн, Монголын бэлчээр ашиглагчдын нэгдсэн холбоо НҮТББ, Монголын газар зохион байгуулалтын холбоо НҮТББ, “Дорнод Монголын хуурай хээрийн ландшафт, биологийн олон янз байдлын хамгаалал” төсөл, “Хөдөө аж ахуйн менежмент, экосистемийн тогтвортой байдлыг хангах”, Ногоон алт Монголын бэлчээр судлалын төв, Азийн хөгжлийн банкнаас хэрэгжүүлж буй холбогдох төслийн төлөөллүүд бүхий нийт 25 хүн оролцлоо.