“Монгол Улсын Хаягийн мэдээллийн системийг шинэчлэх” төслийн хүрээнд манай улсад айлчилж буй БНСУ-ын Дотоод хэрэг, Аюулгүй байдлын дэд сайд Ким Мин Жэ болон холбогдох албаныхныг өнөөдөр /2025.03.24/ Газар зохион байгуулалт, геодези, зураг зүйн ерөнхий газрын дарга А.Энхманлай хүлээн авч уулзлаа.

Монгол Улсын сайд, Засгийн газрын Хэрэг эрхлэх газрын дарга Н.Учрал, БНСУ-ын Дотоод хэрэг, Аюулгүй байдлын сайд И Сан Мин-тэй 2024 оны 09 дүгээр сарын 23-ны өдөр “Цахим Засгийн газар хөгжүүлэх чиглэлээр хамтран ажиллах тухай” санамж бичиг байгуулж байсан.

Мөн Монгол Улсын Газар зохион байгуулалт, геодези, зураг зүйн ерөнхий газраас БНСУ-ын Дотоод хэрэг, аюулгүй байдлын яам, Газар, геоматик /LX/-ийн корпорацитай “Монгол Улсын хаягийн мэдээллийн системийг шинэчлэх” төсөл хэрэгжүүлэх зорилгоор хамтран ажиллах санамж бичгийг байгуулсан билээ.

Энэ удаагийн айлчлалаар дээрх санамж бичгийн дагуу “Монгол улсын хаягийн мэдээллийн системийг шинэчлэх” төслийг тус улсын КОЙКА Олон улсын хамтын ажиллагааны байгууллагын дэмжлэгтэйгээр 2026 оноос эхлэн дөрвөн жилийн хугацаатай хэрэгжүүлэхээр баталсан болохыг албан ёсоор мэдэгдэж, уг төсөлтэй холбоотой хоёр талын хамтын ажиллагааг улам бэхжүүлж ажиллах талаар санал солилцлоо.

“Монгол улсын хаягийн мэдээллийн системийг шинэчлэх” төслийг хэрэгжүүлснээр дараах үр дүнд хүрэх юм. Үүнд:

Хаягжуулалтын тухай хууль, тогтоомж, эрх зүйн орчныг шинэчлэх;

Хаягийн стандартыг олон улсын жишигт нийцүүлэн боловсруулж, батлан хэрэгжүүлэх

Хаягийн мэдээллийн системийг шинэчлэн хөгжүүлж, хэрэглээнд гаргах

Хаягжуулалтын чиглэлээр ажиллах албан хаагчдыг сургаж, чадавхжуулах;

Хаягийн мэдээллийн системийг ажиллуулахтай холбоотой техник, тоног төхөөрөмж, технологийн дэмжлэг үзүүлэх;

Гудамж, зам, талбай, газар, үл хөдлөх эд хөрөнгийг үнэн бодит, алдаагүй хаягжуулах гэх мэт ажлуудыг хийж хэрэгжүүлэхээр төлөвлөөд байна.