Нэгдсэн Үндэстний Байгууллагын боловсрол, шинжлэх ухаан, соёлын байгууллага буюу ЮНЕСКО-гийн ивээл дор Исланд Улсын Хөдөө Аж Ахуйн Их Сургуулийн дэргэд хэрэгждэг “Газрын доройтлыг бууруулах хөтөлбөр” (GRÓ LRT-Land restoration training programme)-ийн захирал, хатагтай Шөф Вилхелмсдоттир (Sjöfn Vilhelmsdottir) нь 2025 оны 01 дүгээр сарын 22-ны өдөр Газар зохион байгуулалт, геодези, зураг зүйн ерөнхий газарт ажиллаж, хөтөлбөрийнхөө талаар танилцуулга хийж, Исланд улсын 6 сарын эрчимжүүлсэн сургалтад оролцох сонирхолтой албан хаагчидтай ярилцлага хийлээ.

Энэ хөтөлбөр нь газар нутаг, экосистемийн менежмент, нөхөн сэргээлттэй холбоотой дэлхийн тулгамдсан сорилтуудыг шийдвэрлэх зорилгоор бага, дунд орлоготой улс орнуудад мэдлэгийг бий болгож, хуваалцаж, чадавхийг бэхжүүлдэг онцлогтой юм. Тус хөтөлбөр нь НҮБ-ын Цөлжилттэй тэмцэх конвенц (UNCCD), Уур амьсгалын өөрчлөлтийн суурь конвенц (UNFCCC) болон Биологийн олон янз байдлын тухай конвенц (CBD) зэрэг конвенцуудын хүрээнд хэрэгжиж байна. www.grocentre.is/lrt

Тус сургалтад Монгол Улсаас 2007 оноос хойш нийт 40 албан хаагч хамрагдсан нь бусад улс орнуудтай харьцуулахад хамгийн олон хүн хамрагдсан бөгөөд одоогийн байдлаар Газар зохион байгуулалт, геодези, зураг зүйн ерөнхий газраас 4 албан хаагч хамрагдаад байна.

Хөтөлбөрийн захирал Шөф Вилхелмсдоттир энэхүү хөтөлбөрийн үр өгөөж, нөлөөлөл нь эерэг үр дүнтэй байгааг хөндлөнгийн байгууллага үнэлсэн, тус хөтөлбөрийн төгсөгчид нь улс орныхоо төлөө үр бүтээлтэй, идэвхи санаачлагатай ажиллаж байгааг онцлон дурдсан юм.

Уулзалтын төгсгөлд тус агентлаг болон орон нутгийн харьяа байгууллагуудаас жил бүр албан хаагчдыг тус сургалтад хамруулах, Монгол Улсад зориулсан богино хугацааны онол, практикийг хослуулсан сургалтыг зохион байгуулахад хамтын ажиллагааг улам өргөжүүлэхээр тогтлоо.